Wid all de big noise whah de big Mook was mekkin bout advertisin free fuh de guvament, it tek a letter writer in the Guyana Times to expose he and show how he is a lyin two-face hypocrite, just like de headitor. After all, birds of a feather does flock together, so no wonder de two of dem like Suru and Duru and bamzee and po. That letter woulda never get publish in the mud paper.
One of dem boys who seh dem is boys who does send out de Mook official photos seh breeze does can’t pass between de Mook and de headitor. Yet de headitor does be shame of some of dem tings whah does come out in de mud paper.
No wonder de headitor does tell everybody that how is de Mook who does want he put in all dem comfufflin lies. But one never far from de other, especially in dem deeds. One of dem boys who seh dem is boys seh dem close like bone in flesh.
A father seh de other day in church that some people sins gon tek long to wash away. Well imagine de Mook and de headitor… even if dem should get born again now, it gon tek eternity to wash way de two of dem sins. It look as if de father was talkin bout de two of dem. But he was friken like dem reporters who friken de Mook to call out he name out in public.
De Mook jump up and seh he willin to publish all guvament ads fuh free. That was Saturday. And then he accuse a minister of only givin one newspaper all de ads.
But in de same article, de minister seh de ads goin to all de papers, but on different days. People know de Mook can’t read, but dem ain’t know he can’t see good too.
Ting-a-ling-a-ling… friend tell friend… mattie tell mattie! De very next day de Mook change he mouth. But de guvament woulda never tek de offer. Dem know de Mook woulda want tax rebate from de s*ity council and from GEE-RA. That is how de Mook stay. Nutten is free. Ask dem reporter who friken to report bout he.